អេស្ប៉ាញ៖ ក្លិបបាល់ទាត់ FC Barcelona បានប្រកាសពីការនាំយកកីឡាករខ្សែការពារ Emerson Royal ពីក្លិប Real Betis វិញ បន្ទាប់ពីកីឡាកររូបនេះបានចំណាយពេលជាមួយ Real Betis ចំនួន ២រដូវកាលក្នុងនាមជាកីឡាករខ្ចីជើង។

ក្លិបបាល់ទាត់ FC Barcelona ត្រូវបានគេដឹងថា នឹងត្រូវចំណាយលុយចំនួន ៩លានអឺរ៉ូ ក្នុងការនាំយកកីឡាកររូបនេះមកចូលរួម ក្រោយពីទើបចុះកិច្ចសន្យាជាមួយខ្សែប្រយុទ្ធអាហ្សង់ទីន Sergio Aguero ដោយគ្មានតម្លៃខ្លួន ព្រមទាំងបានប្រកាសជាផ្លូវការកាលពីម្សិលមិញនេះ។ 

គួរឱ្យដឹងថា ក្លិប Barcelona បាននាំយកកីឡាកររូបនេះមកកាន់ទឹកដីអេស្ប៉ាញពីក្លិប Atletico Mineiro កាលពីឆ្នាំ ២០១៩ ប៉ុន្តែបានដាក់ឱ្យ Betis ខ្ចីជើងពីរដូវកាលតាំងពីពេលនោះ។ ក្នុង ២រដូវកាលកន្លងមកនេះ Emerson បានក្លាយជាកីឡាករសំខាន់ក្នុងបញ្ជី ១១នាក់របស់ Real Betis ដោយបង្ហាញខ្លួនសរុប ៧៣ប្រកួត និងរកគ្រាប់បាល់បញ្ចូលទីបាន ៤គ្រាប់ ព្រមទាំងជួយឱ្យ Real Betis បញ្ចប់រដូវកាលនៅចំណាត់ថ្នាក់លេខ ៦ និងទទួលបានឱកាសបង្ហាញខ្លួននៅពានរង្វាន់ UEFA Europa League នារដូវកាលក្រោយផងដែរ។

យ៉ាងណាមិញ ការមកដល់របស់ Emerson នឹងអាចនាំឱ្យខ្សែការពារ Sergi Roberto ទំនងជាត្រូវចាកចេញនារដូវកាលនេះ ឬអាចត្រូវដាក់ឱ្យខ្ចីជើងទៅកាន់ក្លិបផ្សេង ឬក៏អាចកាត់បន្ថយប្រាក់បៀរវត្សរបស់គេទៀតផង៕